Vizita e ministrit të Jashtëm rus Sergei Lavrov në Serbi është anuluar, raporton CNN.
Zëdhënësja e Ministrisë së Jashtme ruse Maria Zaharova tha të dielën se disa nga fqinjët e Serbisë kishin bllokuar hapësirën e tyre ajrore për avionin e ministrit të jashtëm rus.
Lavrov kishte planifikuar që sot të fluturonte për në Beograd, kryeqytetin e Serbisë.
– Vendet përreth Serbisë kanë bllokuar rrugët ajrore për avionin e Sergei Lavrov që donte të vizitonte Serbinë. Delegacioni rus ishte planifikuar të zhvillonte bisedime në Beograd, por vendet e BE-së dhe NATO-s kanë mbyllur hapësirën e tyre ajrore, tha Zaharova.
Ambasadorja bullgare në Rusi, Eleonora Mitrofanova, tha se Bullgaria ishte një nga vendet që mbylli hapësirën e saj ajrore për aeroplanin e Lavrov.
“Mund të konfirmoj se autoritetet bullgare nuk lejuan aeroplanin e ministrit të Jashtëm rus Sergei Lavrov të fluturonte në Serbi përmes vendit të tyre”, tha Mitrofanova për TASS.
Sipas Reuters, përveç Bullgarisë, Maqedonia veriore dhe Mali i Zi gjithashtu mbyllën hapësirën e tyre ajrore për Lavrov. Të treja janë vende anëtare të NATO-s.
Serbia ka lidhje të forta me Rusinë dhe ka shmangur zgjedhjen e palëve në luftën e Ukrainës.
Presidenti i vendit, Aleksandar Vuçiq, ra dakord me presidentin rus Vladimir Putin muajin e kaluar se Rusia do të rifillonte normalisht furnizimin me gaz në Serbi.
About Post Author
Leave a Reply